Menu vjeshte

Risi e Bisi, pjata e famshme e Venecias

+

risibi

Nga Linda Fishta, Fotografia Armand Habazaj

Është nga pjatat më tipike të Venecias, e njohur dhe në botë. Fama e kësaj pjate, përveç shijes së saj, lidhet edhe me faktin se gatuhej çdo vit kur doxhi uronte popullin për Festën e Republikës së Venecias. Duke bashkuar orizin, si simbol i pjellorisë (që u hidhet nuseve kur martohen) me bizelet, që janë fryt i stinës së pranverës, ky gatim shumë i përhapur në Venecia, u shërbehej pjesëtarëve të qeverisë veneciane në ditën e Shën Markut. Sot, gatuhet shpesh edhe pa pançetë dhe me bizele të ngrira.

PËRBËRËSIT PËR 4 PERSONA:
• 300 g oriz Carnaroli • 250 g bizele kokërr të freskëta ose të ngrira, të ziera më parë me ujë e kripë • 1 qepë e bardhë • 1/2 gotë verë e bardhë • 2 lugë gjalpë i ftohtë nga frigoriferi • lëng perimesh i valuar • 60 g djathë Parmigiano i grirë • kripë e piper sipas nevojës • 60 g pançetë e tymosur në kubikë • pak arrë moskat, nëse ju pëlqen • 1 lugë vaj ulliri

PËRGATITJA:
1.Në një tigan, skuqim pançetën me 1 lugë vaj ulliri. Kur të bëhet krokante, shtojmë bizelet e pas 5 minutash
fikim zjarrin. E lëmë mënjanë.
2.Në një tenxhere, skuqim qepën me 1 lugë gjalpë. Shtojmë orizin, i përziejmë vazhdimisht për 5 minuta,
e shuajmë me verë dhe kur kjo të avullojë, shtojmë një garuzhdë lëng të valuar. Vazhdojmë zierjen e orizit dhe shtojmë lëng vetëm kur të ketë shteruar lëngu që kemi hedhur më parë. E përziejmë herë pas here me lugë druri.
3.Kur duhen edhe 5 minuta nga përfundimi i zierjes së orizit, shtojmë bizelet dhe pançetën që kemi lënë mënjanë në tigan, dhe e përziejmë me lugë druri. Fikim zjarrin, shtojmë direkt nga frigoriferi gjalpin e ftohtë, të prerë në kubikë, djathin e grirë, arrën moskat, kripë e piper sipas nevojës. E përziejmë me lugë druri dhe e shërbejmë menjëherë.